Bible

1 阿拉伯人个突擊隊識將猶大王約何蘭所有个孻仔全部㓾掉，只有賸到滿子亞哈謝。所以，耶路撒冷人民立亞哈謝承接厥爸个王位。 2 亞哈謝二十二歲个時做猶大王，在耶路撒冷統治一年。厥姆安到亞她利雅，係以色列王亞哈个妹仔，暗利个孫女。 3 亞哈謝也學亞哈家个壞模樣；因為厥姆代佢出主意，帶佢做壞事。 4 亞哈謝行上主看做邪惡个事；因為厥爸死後，亞哈王屋下个人變做佢个顧問，教壞佢。 5 佢聽佢等个建議，㧯以色列王亞哈个孻仔約蘭聯合起來，去攻打敘利亞王哈薛。雙方軍隊在基列个拉末相㓾，約蘭著傷， 6 就轉到耶斯列城療傷；亞哈謝到該位去看佢。 7 上帝因為亞哈謝去看約蘭這件事使佢滅亡。亞哈謝在耶斯列个時，佢㧯約蘭堵到寧示个孫仔耶戶；耶戶係上主揀選來毀滅亞哈王朝个人。 8 該時，耶戶堵好去執行上帝對亞哈家个責罰，堵到該兜跈亞哈謝來个猶大領袖㧯佢該兜姪仔。耶戶將佢等全部㓾掉。 9 亞哈謝囥在撒馬利亞，被耶戶个人尋到，將佢交給耶戶㓾死。佢等將佢埋葬，因為佢等講：「無論樣般講，佢還係該專心尋求上主个約沙法王个孫仔。」亞哈謝家無賸一個人好保存王位。 10 亞哈謝王个阿姆亞她利雅一聽講厥孻仔被人㓾死，就下令將猶大王个家族全部剿滅。 11 亞哈謝有一個共爺無共𡟓个老妹安到約示芭；姖係約何蘭王个妹仔、嫁給祭司耶何耶大。約示芭將亞哈謝个一個孻仔約阿施對該兜會被人㓾死个王子中偷偷仔救出來，將佢㧯乳𡟓囥在聖殿肚个間房。約示芭將約阿施囥起來，救佢離開亞她利雅个手，無被太后㓾死。 12 亞她利雅用太后个身份統治猶大个期間，約阿施在上帝个聖殿肚囥六年。